عصر الأمركة

يا صاحبي عشرين مرّه قلت لـك  لا تشتكـي

                  لا تشتكي من جور بقعا والظـروف المنهكـه

 

دام ان حياتك معركه خلّك ذكي .. خلّك ذكي

                 واصبر على جور الزمن. تقدر تدير المعركه

 

اللي تعوّد يشتكي… والله لو يبكـي..  بكـي

                       ما يرحمه وقته.. ولا تنفع معـاه  البكبكـه

 

يا هيه يللي تلعب ادوار الفقيـد أحمـد زكـي

                       عمر المقلّد. ما ضبـط ميّـه ميـه للماركـه

 

قد ترتكب اكبر خطأ لـلآن إذا لـم تدركِ

                 إن ابيض النور اسطعه وان اسود الليل احلكه

 

ولا تراهن ع اختلاف الحنبلي والمالكي

                          الله واحـد والنبي ولكـل مذهب مسلكه

 

وأنا لي اسلوبي ولي نهجي وتعرف مسلكـي

                        وانته تبرّر بالخفا حـادث جزيـرة فيلكـه

 

من المهم اعرف نوايا المخـرج المتأمركِ

                      مب الأهم اني اشاهـد مسرحيـه مضحكـه

 

أبتحمل جور وقتي لو يزيـد الكـي.. كـي

                   والعنف الاعمى ما يؤثر في شموخ المملكـه

 

ماني ضحيّه من ضحايا غزو فكري مهلكِ

                       ولا تأثـرت بْرسـوم الشاشـه  المتحركـه

 

أكبر دليل اني مع خفض الرسوم الجمركـي

                     دام ان شعوب العالم الثالث أمـم  مستهلكـه

 

ياللأسف من غير لا يدري.. منيـر بْعلبكـي

                   مهّد لعصر الأمركه من قبل عصر الأمركـه

 

وأن كان ردّك ( للتصعلك) يا الزعيم الأوزبكـي

                        أنا معلم فـي فنـون الشّيطنـه  والصعلكـه

 

هذي قوافي مربكه تختم بـ (كه) تبدا  بـ (كي)

                    لكن على قول البعض هذي لـزوم  الأنتكـه

 

واشعاري ان كانت تدل انّي ذكي  ومحنّكِ

                      المجتمع ممكـن يسمّيهـا قصايـد (فرنكـه)

 

ولاّ النهايه الشِّعِر يبقى حكي ضمن  الحكـي

                    ما غير انا يعجبني آعقّـد قصيـدي واحبكـه

 

والقصد الاول والأخير استخدم اشعاري  لكي

                   أخاطب اصحاب العقول النيّـره  والمدركـه

 

 

عن admin

اضف رد

لن يتم نشر البريد الإلكتروني . الحقول المطلوبة مشار لها بـ *

*

نرجوا كتابة الرقم الصحيح المحمي *